Reykjavíkurleikarnir halda sínu striki

Reykjavíkurleikarnir, Reykjavík International Games, fara fram í fimmtánda sinn í ár, þrátt fyrir nýjar fjöldatakmarkanir og margvíslegar áskoranir. Keppnin fer fram dagana 29. janúar til 6. febrúar.

Keppnisgreinar í ár verða 22 og sérstök áhersla verður lögð á keppni okkar besta íþróttafólks við keppendur frá Norðurlöndum.  Þetta á einkum við um Cross-fit, dans og skák, sem er ný grein á leikunum (ásamt strandblaki), en í þessum þessum þremur greinum verður para- eða liðakeppni.  Þrátt fyrir óvissu varðandi íþróttir og keppnir undanfarna mánuði hefur áhugi á þátttöku verið gríðarmikill jafnt frá innlendu sem erlendu íþróttafólki og mótshaldarar lagt nótt við dag til þess að hægt verði að halda leikana. Hægt verður verður að fylgjast með leikunum á RÚV og RÚV2 sem og streymi á heimasíðu Reykjavíkurleikanna, www.RIG.IS.

“Það er nánast kraftaverk að mótshaldarar hafa náð öllum þráðum saman þrátt fyrir margvíslegt mótlæti, nú síðast í formi áhorfendabanns og fjöldatakmarkana.  Þeir hafa flestir orðið fyrir miklum fjárhagslegum skakkaföllum, annað árið í röð, og gerum við þá sanngjörnu kröfu að komið verði til móts við þá til jafns við aðra aðila í samfélaginu, hvort sem um er að ræða kráa- og veitingahúsaeigendur eða aðra” segir Gústaf Adolf Hjaltason, forseti framkvæmdaráðs leikanna.

Frekari upplýsingar er að finna á vefsíðunni, www.rig.is