Alþjóðlegu Reykjavíkurleikarnir (RIG) verða ekki haldnir árið 2027. Ákvörðunina tók stjórn Íþróttabandalags Reykjavíkur í ljósi aukins kostnaðar og fyrirhugaðs niðurskurðar í fjárhagsáætlun Reykjavíkurborgar. Ákvörðunin var ekki léttbær ef horft er til hlutverks leikanna sem vettvangs fyrir alþjóðlega keppni fyrir afreksfólk okkar á heimavelli
Reykjavíkurleikar hafa verið haldnir árlega frá árinu 2008 og skapað mikilvægan vettvang fyrir fjölbreyttar íþróttagreinar og alþjóðlega keppni á íslenskri grundu.
Þrátt fyrir hléið er ekki litið á ákvörðunina sem endalok leikanna. Vonir standa til að þeir geti snúið aftur árið 2028.
Sundmót á vegum Sundsambands Íslands verður þó haldið undir merkjum Reykjavíkurleikanna í janúar 2027, enda er undirbúningur þess þegar langt kominn.
