Fréttir

ÍBR komið með aðild að UMFÍ

Íþróttabandalag Reykjavíkur fékk aðild að Ungmennafélagi Íslands laugardaginn 12.október 2019 ásamt Íþróttabandalag Akureyrar og Íþróttabandalag Akraness. Þetta var samþykkt á 51. sambandsþingi UMFÍ að Laugarbakka með nær öllum greiddum atkvæðum. ÍBR sótti fyrst um aðild að hreyfingunni 17.október 1997 og því kærkomið að fá hana loks samþykkta.

Skoða nánar

Vinnustofa um kynferðislegt ofbeldi og áreitni

Íþróttabandalag Reykjavíkur stendur fyrir vinnustofu um kynferðislegt ofbeldi og kynferðislega áreitni í íþróttum fimmtudaginn 19. september. Norski sérfræðingurinn, Håvard Øvregård, kemur til landsins og fjallar um mikilvægi reglna og verkferla í tengslum við ofbeldi og áreitni í íþróttum. Lögreglan og Barnavernd kynna hvernig þau geta aðstoðað íþróttahreyfinguna í þessum málaflokki, og ÍTR fer yfir mikilvægi þess að hafa skýra ráðningarsamninga og hvaða bakgrunnsupplýsingar er nauðsynlegt að hafa.

Vinnustofan verður í sal 1 í Laugardalshöll, gengið inn um inngang A, frá kl. 14:00 – 16:10.

Aðgangur er ókeypis og opinn öllum áhugasömum en nauðsynlegt að skrá sig með því að senda póst á This email address is being protected from spambots. You need JavaScript enabled to view it..

Mikilvægt er að sem flest íþróttafélög sendi fulltrúa á vinnustofuna.

IBR19 vinnustofa september

Skoða nánar

ÍBR 75 ára

Íþróttabandalag Reykjavíkur á 75 ára afmæli í dag 31.ágúst. Af því tilefni var vígt upplýsingaskilti um Melavöllinn á horni Suðurgötu og Hringbrautar. Þar komu saman formenn og framkvæmdastjórar aðildarfélaga ÍBR ásamt stjórn ÍBR, fulltrúum ÍSÍ og fleiri góðum gestum. Við skiltið sagði Sigmundur Ó Steinarsson, blaðamaður, skemmtilegar sögur frá Melavellinum og var síðan haldið í sögugöngu í fylgd Stefáns Pálssonar, sagnfræðings, að Hólatorgi 2 þar sem ÍBR hafði fyrst aðsetur og í Vonarstræti þar sem ÍBR var stofnað. Að sögugöngu lokinni snæddu gesti hádegisverð í Iðnó. Sigríður Jónsdóttir varaforseti ÍSÍ færði bandalaginu glæsilegt málverk eftir Elsu Nielsen í tilefni dagsins og flutti kveðju framkvæmdastjórnar ÍSÍ. Að hádegisverði loknum var Örn Andrésson fyrirverandi stjórnarmaður í ÍBR og ÍSÍ til margra ára sæmdur Heiðursstjörnu ÍBR. Meðfylgjandi myndir voru teknar í afmælinu í dag.

melavollur

Upplýsingaskiltið um Melavöllinn stendur á horni Suðurgötu og Hringbrautar við Þjóðarbókhlöðuna

sigmundur

Sigmundur Ó Steinarsson, blaðamaður, sagði skemmtilegar sögur frá Melavellinum

sveinn ellert 

Sveinn og Ellert léku á Melavellinum á árum áður

stefan palsson

Stefán Pálsson sagði á sinn einstaka líflega hátt frá stofnun ÍBR og sögu íþróttafélaganna í Reykjavík í afmælissögugöngunni

orn heidursstjarna

Ingvar Sverrisson, formaður ÍBR, Örn Andrésson með Heiðursstjörnu ÍBR og Frímann Ari Ferdinandsson, framkvæmdastjóri ÍBR

 

Skoða nánar

Skólahúsin opna 2.september

Íþróttabandalag Reykjavíkur sér um að leigja út tíma til almenningshópa í skólaíþróttahúsum Reykjavíkur á veturna. Skólahúsin opna 2.september 2019 og er tímabilið til 30.apríl 2020.

Nokkrir tímar eru nú lausir til umsóknar. Smellið hér til að skoða hvaða íþróttahús eru til leigu og hvaða tímar eru lausir.

Nánari upplýsingar um útleigu á tímum til almenningshópa veitir Steinn Halldórsson í gegnum netfangið This email address is being protected from spambots. You need JavaScript enabled to view it. og í síma 5353707.

fotbolti

Skoða nánar

Gott hlaupasumar

Íþróttabandalag Reykjavíkur stendur fyrir þremur stórum hlaupaviðburðum á sumrin, Miðnæturhlaupi Suzuki, Laugavegshlaupinu og Reykjavíkurmaraþoni Íslandsbanka. Hlaupasumarið 2019 gekk mjög vel og var góð þátttaka í öllum viðburðum. 

Miðnæturhlaup Suzuki 2019 fór fram fimmtudagskvöldið 20.júní í frábæru veðri og var þetta í 27.sinn sem hlaupið fór fram. Til þátttöku voru skráðir 3015 hlauparar sem er nýtt þátttökumetmet. Um 1200 erlendir hlauparar voru á meðal þátttakenda frá 57 löndum. Eitt brautarmet var sett en það var Andrea Kolbeinsdóttir sem setti það í 5 km hlaupi kvenna.

Laugavegshlaupið fór fram í 23.sinn laugardaginn 13.júlí. Óvenju lítill snjór var á hlaupaleiðinni þetta árið og aðstæður mjög góðar. 513 hlauparar komu í mark í Þórsmörk og hafa aldrei jafn margir lokið hlaupinu. Fyrst í mark voru þau Þorbergur Ingi Jónsson og Anna Berglind Pálmadóttir.

Reykjavíkurmaraþon Íslandsbanka fór fram í 36.sinn í frábæru hlaupaveðri laugardaginn 24.ágúst. Til þátttöku voru skráðir 14.667 hlauparar á öllum aldri. Þátttökumet var sett í 10 km hlaupinu þar sem 7203 tóku þátt og 3 km skemmtiskokki þar sem 2436 voru skráðir til þátttöku. Tæplega 3000 erlendir hlauparar frá 80 löndum tóku þátt í hlaupinu. Hlauparar gátu safnað áheitum á hlaupastyrkur.is og söfnuðust rúmlega 167 milljónir til góðra málefna sem er nýtt áheitamet.

Mörg hundruð félagar úr íþróttafélögunum í Reykjavík störfuðu við hlaupin í fjáröflun fyrir sitt félag. Sendum við þeim bestu þakkir fyrir vel unnin störf.

IMG 20190620 212554 minni2

Skoða nánar

Góð ferð til Svíþjóðar

Reykvíski hópurinn sem tók þátt í Grunnskólamóti Höfuðborga Norðurlandanna í vikunni er komin heim eftir góða ferð til Svíþjóðar. Hópurinn hélt af stað úr Laugardalnum á sunnudaginn og hefur verið í þéttri dagskrá síðan sem samanstóð af bæði keppni og skemmtun með jafnöldrum frá hinum Norðurlöndunum.

Knattspyrnulið drengja varð í öðru sæti á mótinu. Þeir sigruðu Osló 8-1, Kaupmannahöfn 6-0 og Helsinki 3-0 en töpuðu fyrir heimamönnum frá Stokkhólmi 3-1. Strákarnir voru óheppnir að skora ekki fleiri mörk í leiknum gegn Stokkhólmi því þeir fengu mörg færi en geta engu að síður verið stoltir af góðum árangri.

Handknattleikslið stúlkna varð í fimmta sæti á mótinu. Þær töpuðu fyrir Osló 25-17, Stokkhólmi 24-11 og Kaupmannahöfn 17-10. Lokaleikurinn gegn Helsinki var hnífjafn en endaði með 16-15 sigri Finnanna. Stelpurnar stóðu sig mjög vel á mótinu og héldu alltaf áfram að berjast af krafti þrátt fyrir erfiðar viðureignir gegn sterkari liðum.

Frjálsíþróttalið stúlkna varð í þriðja sæti og frjálsíþróttalið drengja varð í fjórða sæti í stigakeppni mótsins en keppt var í 800 m hlaupi, 100 m hlaupi, kúluvarpi, langstökki og hástökki. Efsta sæti Reykvíkinga í einstökum greinum náði María Helga Högnadóttir en hún var í 3.sæti í hástökki með stökk uppá 1,52 m.

Í mótslok var keppt í boðhlaupi og sigraði lið Reykjavíkur í 12x60m boðhlaupskeppni handknattleiks og knattspyrnuliða en frjálsíþróttaliðið var í 4.sæti í 4x200 m boðhlaupskeppni frjálsíþróttaliða.

Fararstjórar og þjálfarar þakka hópnum fyrir góða ferð. Krakkarnir stóðu sig virkilega vel innan vallar sem utan og voru sér og sínum til sóma.

Lista yfir lið Reykjavíkur má finna hér.

team rvk 2019

Reykvíski hópurinn rétt fyrir brottför úr Laugardalnum

Skoða nánar

Kostuð meistaranámsstaða

hr ibr namsstada

Laus er til umsóknar námsstaða í meistaranámi í íþróttavísindum og þjálfun (MSc) við íþróttafræðideild Háskólans í Reykjavík.

Staðan er kostuð af Háskólanum í Reykjavík og Íþróttabandalagi Reykjavíkur (IBR) og mun nemandinn ekki greiða skólagjöld meðan á námstíma stendur. Umsóknarfrestur er til 5. júní og mun nemandi hefja nám strax á haustönn, samkv. skóladagatali.

Skuldbindingar nemanda eru eftirfarandi:

  • Að gera yfirgripsmikla rannsókn er tengist tíðni og alvarleika íþróttatengdra heilsufarsvandamála í Reykjavík. Rannsóknin yrði hluti af 60 ECTS meistararitgerð til Msc gráðu í íþróttavísindum og þjálfun. Rannsóknin yrði tengd BATNA verkefninu en BATNA verkefnið er skilgreint sem klasi þeirra sem vilja vinna að lágmörkun íþróttatengdra heilsufarsvandamála, s.s. stoðkerfisvandamála og sálrænna kvilla
  • Akademískur starfsmaður HR mun vera ábyrgðarmaður rannsóknar og leiðbeinandi meistaranemans. Rannsóknin verður gerð í nánu samstarfi við ÍBR.
  • Starfsmenn HR og meistaranemandi munu kynna niðurstöður ritgerðanna fyrir þeim aðilum sem ÍBR myndi óska.
  • ÍBR getur óskað eftir því að nemandi undir handleiðslu kennara íþróttafræðideildar HR veiti ráðgjöf er varðar niðurstöður þeirra mælinga sem gerðar hafa verið.
  • Nemandi leitast eftir því að vinna mörg verkefni tengd BATNA og veitir ÍBR aðgang að verkefnum sínum.

Umsóknir og fyrirspurnir skulu berast á tölvupósti til:
This email address is being protected from spambots. You need JavaScript enabled to view it. og This email address is being protected from spambots. You need JavaScript enabled to view it.

ÍBR og HR gerðu með sér samstarfssamning um ráðstefnur og verkefnið BATNA í janúar 2019 og er þessi kostaða meistaranámsstaða hluti af því samstarfi. Sjá nánar hér.

Skoða nánar

Grunnskólamót Norðurlandanna í Stokkhólmi

Grunnskólamót höfuðborga Norðurlandanna 2019 fer fram í Stokkhólmi dagana 20.-24.maí. Mótið hefur verið haldið árlega frá árinu 1948 fyrir utan eitt ár og hefur lið frá Reykjavík tekið þátt síðan 2006 (sjá nánar hér).

Reykvíski hópurinn heldur til Stokkhólms á sunnudaginn en í liðinu eru 41 keppandi úr átján skólum og tíu félögum í Reykjavík, fjórir þjálfarar og tveir fararstjórar. Keppendur í úrvalsliði Reykjavíkur eru 15 leikmenn í knattspyrnu drengja, 10 leikmenn í handknattleik stúlkna, 8 drengir og 8 stúlkur í frjálsíþróttum. Smellið hér til að skoða lista yfir lið Reykjavíkur og hér til að skoða dagskrá reykvíska hópsins.

Upplýsingasíða mótsins er nordiccapitalsschoolgames.com og þar verða birt úrslit. Fréttir af gengi reykvísku krakkanna verða einnig birtar hér á ibr.is og á Facebook.

ncsg

Skoða nánar

Vel mætt á þing ÍBR

Miðvikudaginn 20.mars og fimmtudaginn 21.mars fór 49. þing Íþróttabandalags Reykjavíkur fram í Laugardalshöll. Góð mæting var á þingið en um 70 fulltrúar frá 29 félögum og ráðum tóku þátt í þingstörfum. 

Ingvar Sverrisson formaður ÍBR setti þingið en að setningarræðu lokinni ávörpuðu þau Þórdís Lóa Þórhallsdóttir, formaður borgarráðs, og Hafsteinn Pálsson, ritari framkvæmdastjórnar ÍSÍ, þingið. Báðir gestirnir þökkuðu íþróttafélögunum í Reykjavík fyrir þeirra frábæra starf og hvöttu þau áfram til góðra verka. Hafsteinn kallaði í lok ræðu sinnar uppá svið þau Gígju Gunnarsdóttur, ritara stjórnar ÍBR, og Ingvar Sverrisson, formann ÍBR, og veitti þeim gullmerki ÍSÍ.

Góðar umræður voru um fyrirliggjandi þingtillögur í nefndarfundunum á miðvikudagskvöldið og voru allar tillögur samþykktar samhljóða á seinni þingdeginum. Smellið hér til að skoða samþykktir þingsins.

Ingvar Sverrisson var endurkjörinn formaður ÍBR til næstu tveggja ára en hann hefur verið í því embætti síðan árið 2009. Örn Andrésson sem verið hefur varaformaður ÍBR undanfarin ár og setið í stjórn bandalagsins undanfarin 30 ár dró framboð sitt til áframhaldandi stjórnarsetu til baka á þinginu. Örn fékk miklar þakkir frá félögum sínum í stjórninni og þingfulltrúum fyrir frábært starf. Margrét Valdimarsdóttir kemur ný inní framkvæmdastjórnina en aðrir í stjórninni eru Björn M. Björgvinsson, Gígja Gunnarsdóttir, Guðrún Ósk Jakobsdóttir, Lilja Sigurðardóttir og Viggó H. Viggósson. Í varastjórn voru kjörnir þeir Haukur Haraldsson og Gústaf Adolf Hjaltason.

Hér á ibr.is má finna ársskýrslu og ársreikninga fyrir starfsárin 2017 og 2018 ásamt tillögum, samþykktum og fleiri gögnum þingsins.

thing19 god maeting

 Vel var mætt á 49.þing ÍBR í Laugardalshöllinni

thing19 gullmerki isi

Ingvar Sverrisson og Gígja Gunnarsdóttir fengu gullmerki ÍSÍ sem Hafsteinn Pálsson afhenti.

thing19 samhljoma

Sigríður Jónsdóttir stýrði þinginu af mikilli röggsemi

Skoða nánar

49.þing ÍBR 20.-21.mars 2019

49. þing Íþróttabandalags Reykjavíkur verður haldið dagana 20. - 21. mars í Laugardalshöll.

Þingfundur hefst miðvikudaginn 20. mars kl. 17:00. Nefndir munu starfa að loknum fyrri hluta þings, á miðvikudagskvöldinu, í fundarsölum ÍSÍ í Íþróttamiðstöðinni. Gert er ráð fyrir að þingfulltrúar geti tekið þátt í nefndarfundum fyrsta klukkutímann en síðan starfi nefndir fyrir luktum dyrum og ljúki sinni vinnu eigi síðar en kl. 22:30. Þeir sem hafa áhuga á að starfa í nefndum mega gjarnan koma boðum um það til skrifstofu ÍBR. Þingfundi verður fram haldið fimmtudaginn 21. mars kl. 17:00. 

Kosið er á þingi ÍBR um formann, þrjá stjórnarmenn úr fráfarandi stjórn, þrjá stjórnarmenn og þrjá varamenn. Kjörnefnd ÍBR minnir á að frestur til að skila framboðum rennur út 3 vikum fyrir þing þ.e. 27. febrúar n.k. Samkvæmt lögum ÍBR má ekki kjósa þrjá eða fleiri frá sama aðildarfélagi í stjórn. Formenn einstakra félaga, sérráða, sérsambanda eða annarra íþróttahéraða geta ekki setið í framkvæmdastjórn. Framboðum skal skilað til skrifstofu ÍBR

Þau mál, sem aðilar óska að verði á dagskrá, skulu berast ÍBR í síðasta lagi 4 vikum fyrir þingsetningu eða fyrir 20. febrúar.

Hér á ibr.is er hægt að nálgast upplýsingar um þingið sem framundan er og munu fleiri gögn bætast við þegar nær dregur.

thing2017

Skoða nánar

Norðurljósahlaup Orkusölunnar

Laugardaginn 9.febrúar fór Norðurljósahlaup Orkusölunnar fram í miðbæ Reykjavíkur. Þetta er þriðja árið í röð sem Íþróttabandalag Reykjavíkur stendur fyrir Norðurljósahlaupi í tengslum við Vetrarhátíð. 

Norðurljósahlaupið er 5 km skemmtiskokk eða ganga um miðbæ Reykjavíkur þar sem keppendur fá að upplifa borgina í nýju ljósi. Hlaupið er hjá helstu kennileitum borgarinnar sem eru upplýst í tilefni Vetrarhátíðar auk þess sem búið er að koma fyrir skemmtistöðvum með ljósum og tónlist á leiðinni. Þátttakendur fá allir stemmingspoka með upplýstum glaðningi líkt og gleraugum og armbandi og eru því hluti af ljósasýningunni. Engin tímataka er í hlaupinu því það er ekki „keppni“ sem slík, heldur upplifun.

Sjálfboðaliðar úr íþróttafélögunum í Reykjavík störfuðu við brautargæslu og fleiri störf í hlaupinu í fjáröflun fyrir sitt félag. 

Nánari upplýsingar um Norðurljósahlaup Orkusölunnar má finna á nordurljosahlaup.is.

 F3B5028 Olafur Thorisson minni

Skoða nánar

Lífshlaupið - landskeppni í hreyfingu

Lífshlaupið er heilsu- og hvatningarverkefni Íþrótta- og Ólympíusambands Íslands sem höfðar til allra landsmanna. Markmið þess er að hvetja landsmenn til þess að fara eftir ráðleggingum embættis landlæknis um hreyfingu hvort sem er í frítíma, vinnu, skóla eða við val á ferðamáta. Í ráðleggingunum segir að börn og unglingar ættu að hreyfa sig í minnst 60 mínútur daglega og fullorðnir ættu að stunda miðlugserfiða hreyfingu í minnst 30 mínútur daglega.

Lífshlaupið skiptist í fjóra keppnisflokka:
• vinnustaðakeppni frá 6. – 26. febrúar, fyrir 16 ára og eldri (þrjár vikur)
• framhaldsskólakeppni frá 6. - 19. febrúar, fyrir 16 ára og eldri (tvær vikur)
• grunnskólakeppni frá 6. – 19. febrúar, fyrir 15 ára og yngri (tvær vikur)
• einstaklingskeppni þar sem hver og einn getur skráð inn sína hreyfingu allt árið

Allir landsmenn eru hvattir til þess að taka þátt í Lífshlaupinu og skapa skemmtilega stemningu og auka félagsandann á vinnustaðnum/í skólanum. Skráning er hafin og um að gera að taka þátt frá upphafi. Skráningarferlið er einfalt og þægilegt. Gaman er að geta fylgst með sinni hreyfingu og jafnframt tekið þátt í þessari skemmtilegu landskeppni. Skrá má alla hreyfingu inn á vefinn svo framarlega sem hún nær ráðleggingum embættis landlæknis um hreyfingu. Börnum 15 ára og yngri er ráðlagt að hreyfa sig í a.m.k. 60 mínútur á dag og 16 ára og eldri a.m.k. 30 mínútur á dag. Einnig er auðvelt að ná í hreyfinguna sína úr Strava og Runkeeper fyrir þá sem það nota.

SKRÁÐU ÞIG TIL LEIKS Á www.lifshlaupid.is

lifshlaup

Skoða nánar

SJÁ ALLAR FRÉTTIR