1. grein

Íþróttabandalag Reykjavíkur, skammstafað ÍBR, er héraðssamband íþrótta- og ungmennafélaga í Reykjavík. Það starfar samkvæmt lögum ÍSÍ, 6. kafla og íþróttalögum nr. 64 frá 12. júní 1998, 6.gr.

2. grein

Hlutverk ÍBR er:

a) Að gæta hagsmuna íþróttahreyfingarinnar í Reykjavík og vera málsvari hennar gagnvart opinberum aðilum.
b) Að stuðla að samstarfi íþróttafélaganna og veita þeim ráðgjöf.
c) Að hafa frumkvæði um eflingu íþrótta- og félagsmálastarfs í Reykjavík.
d) Að safna upplýsingum starf og aðstæður íþróttahreyfingarinnar í Reykjavík og kynna fyrir almenningi og borgaryfirvöldum.
e) Að stjórna sameiginlegum íþróttamálum Reykjavíkur og vera þar fulltrúi ÍSÍ, en sérráð, sem stofnuð eru, fara með stjórn sérgreinamála sbr.17.gr
f) Að aðstoða við skipulag, undirbúning og framkvæmd íþróttamóta í héraðinu.
g) Að varðveita og skipta milli félaganna því fé, sem til þess hefur verið veitt.
h) Að staðfesta lög aðildarfélaga.
i) Að fylgjast með því að starfsemi aðildarfélaga fari fram skv. gildandi lögum þeirra og íþróttahreyfingarinnar í heild. Vanræki aðildarfélag að halda aðalfund á tilsettum tíma, skal stjórn héraðssambandsins, ef þörf krefur, boða til fundarins og sjá um framkvæmd hans.

3. grein

Öll félög í Reykjavík, sem hafa íþróttir og æskulýðsstarf á stefnuskrá sinni, eiga rétt á að gerast aðilar að ÍBR, enda fullnægi þau þeim skilyrðum, sem á hverjum tíma gilda um frjálsa íþróttastarfsemi.

4. grein

Óski félag að gerast aðili að ÍBR, skal það senda stjórn ÍBR umsókn sína ásamt lögum félagsins, skýrslu um stofndag þess og ár, stjórn þess og tölu félagsmanna. Samhliða umsókn um aðild skal greiða inntökugjald sem stjórn ÍBR ákveður hverju sinni. Uppfylli félagið inntökuskilyrði þessara laga, öðlast það réttindi hjá bandalaginu þegar stjórn ÍBR hefur samþykkt aðild þess.

5. grein

Aðildarfélög skulu senda starfsskýrslur með iðkendatölum og ársreikningum til ÍBR fyrir 15. apríl ár hvert. Fyrir 1. júní ár hvert skulu félögin skila ársskýrslu og árituðum endurskoðuðum ársreikningi til héraðssambandsins. Berist þessar skýrslur ekki innan tilskilinna tímamarka er stjórn ÍBR heimilt að fresta samkvæmt eigin ákvörðun greiðslum á hlutdeild viðkomandi aðila í tekjum Íslenskrar getspár þar til skýrslur hafa borist.

6. grein

Skattar aðildarfélaganna til ÍBR miðast við tölu gjaldskyldra félagsmanna, þ.e. 16. ára og eldri. Þing ÍBR ákveður upphæð skattsins fyrir hvert ár. Skýrslu- og reikningsár ÍBR miðast við almanaksárið.

7. grein

Hvert það aðildarfélag, sem ekki hefur haldið aðalfund og sent skýrslur og ársreikninga í samræmi við 5. gr., missir atkvæðisrétt sinn á næsta þingi ÍBR og missir einnig rétt til að tilnefna fulltrúa á Íþróttaþing.

Líði annað ár án þess að félag haldi aðalfund eða geri skil á skýrslum, ársreikningum og gjöldum, getur þing ÍBR tekið ákvörðun um, hvort félaginu skuli vikið úr héraðssambandinu.

Að öðru leyti vísast til 6. kafla í lögum ÍSÍ.

8. grein

Þing ÍBR skal háð annað hvert ár á tímabilinu 1. febrúar til 1. júlí. Til þingsins skal boða með tveggja mánaða fyrirvara þá, sem rétt eiga á þingsetu, sbr. 10. gr. Þá skal og senda bandalagsaðilum upplýsingar um fjölda fulltrúa þeirra á þinginu auk kjörbréfs.

Þau mál, sem aðilar ÍBR óska að verði á dagskrá, skulu berast stjórn íþróttabandalagsins í síðasta lagi fjórum vikum fyrir þingsetningu.

Allir fulltrúar skulu vera tilgreindir á kjörbréfi frá viðkomandi sambandsaðila og skal kjörbréfum skilað inn til framkvæmdastjórnar eigi síðar en 2 vikum fyrir þing.

Eigi síðar en tveimur vikum fyrir þingbyrjun skal aðilum send dagskrá þingsins og ársskýrsla og tillögur sem borist hafa ásamt þeim tillögum sem framkvæmdarstjórn hyggst leggja fyrir þingið.

Eigi síðar en viku fyrir þing skulu aðilum sendir endurskoðaðir ársreikningar.

Þing ÍBR er lögmætt, ef löglega hefur verið til þess boðað.

Á þingi skal kjósa 3 manna kjörnefnd og einn til vara, sem starfar til loka næsta þings. Tilkynningar um framboð til formanns og stjórnar Íþróttabandalags Reykjavíkur skulu berast kjörnefnd eigi síðar en þremur vikum fyrir þing. Er þá framboðsfrestur útrunninn. Hafi ekki nægilegur fjöldi gefið kost á sér á þeim tíma, er kjörnefnd heimilt að framlengja framboðsfrestinn enda sé það tryggilega tilkynnt sambandsaðilum. Hafi, þrátt fyrir það, eigi borist næg framboð skal kjörnefnd hlutast til um að afla nauðsynlegs fjölda framboða.

Kjörnefnd er eftirlitsaðili með kosningum.

9. grein

Hvert aðildarfélag hefur rétt til að senda fulltrúa á sambandsþing. Skal tala fulltrúa miðast við tölu félagsmanna síðastliðins starfsárs, þannig að félag með:

1 - 200 félagsmenn hljóti 1 fulltrúa
201 - 400 “ “ 2 fulltrúa
401 - 600 “ “ 3 fulltrúa
601 - 800 “ “ 4 fulltrúa
801 - 1000 “ “ 5 fulltrúa
1001 - 1200 “ “ 6 fulltrúa
1201 - 1400 “ “ 7 fulltrúa
1401 - 1600 “ “ 8 fulltrúa
1601 - og yfir “ “ 9 fulltrúa

Stjórn félagsins skal útfylla kjörbréf fyrir fulltrúa sína og sjá um, að það sé komið á þingið í þingbyrjun.

10. grein

Á þingi ÍBR eiga sæti með málfrelsi, tillögu- og atkvæðisrétti fulltrúar þeir, sem aðildarfélög ÍBR hafa kjörið til þings skv. 9 gr. sbr. þó 7. gr., svo og einn fulltrúi frá hverju sérráði á sambandsssvæðinu sbr. þó 17.gr. Engum fulltrúa er heimilt að fara með fleiri en eitt atkvæði. Að auki hafa eftirtaldir aðilar rétt til þingsetu með málfrelsi og tillögurétt: Framkvæmdastjórn ÍBR, framkvæmdastjórn ÍSÍ, íþróttafulltrúi ríkisins og íþróttafulltrúi Reykjavíkurborgar.

11. grein

Dagskrá þingsins skal vera þessi:

1. Þingsetning
2. Kosning fyrsta og annars þingforseta og fyrsta og annars þingritara.
3. Kosning þriggja manna kjörbréfanefndar.
4. Lagt fram og rætt: Skýrsla stjórnar og ársreikningar og atkvæði greidd um þá.
5. Fyrri umræða um fjárhagsáætlun yfirstandandi árs og næsta árs og skattgreiðslur félaganna.
6. Fyrri umræða um lagabreytingar, sem liggja fyrir. Laganefnd kjörin til að athuga breytingar fyrir síðari fund þingsins.
7. Umræða um stefnumótun og starfsáætlun ÍBR.
8. Ræddar tillögur og mál, sem liggja fyrir.
9. Kosnar þrjár 5 manna fastar þingnefndir: fjárhagsnefnd, allsherjarnefnd og kjörnefnd.

ÞINGHLÉ

10. Álit nefnda, umræður og atkvæðagreiðsla.

11.
a) Kosinn formaður ÍBR.
b) Kosnir þrír stjórnarmenn úr fráfarandi stjórn.
c) Kosnir þrír stjórnarmenn til tveggja ára.
d) Kosnir tveir varamenn til tveggja ára.
e) Kosnir tveir endurskoðendur og tveir til vara.
f) Kosin þriggja manna kjörnefnd og einn til vara sbr. 8. grein.
g) Kosnar fastanefndir, er þingið ákveður.

12. Lýst tilnefningu aðildarfélaga á fulltrúum til íþróttaþings og kosnir viðbótarfulltrúar samkvæmt 13. gr.
13. Önnur mál.
14. Þingslit.

Þingið skal standa a.m.k. tvo daga. Þingið skal móta stefnu ÍBR, a.m.k. til næstu tveggja ára með því að ákveða þá málaflokka, sem leggja ber áherslu á í starfi framkvæmdastjórnar. Öllum stærri málum, sem þingið fær til meðferðar, skal vísað til nefnda og starfa þær á milli funda. Allar kosningar skulu vera bundnar og skriflegar, séu fleiri tilnefndir en kjósa skal. Verði atkvæði jöfn, ræður hlutkesti. Í sambandi við þingið má flytja erindi og hafa íþróttasýningar, eftir því sem tími er til.

12. grein

Í málum, sem tilkynnt hafa verið í þingboði, hvort sem er á reglulegu þingi eða aukaþingi, ræður einfaldur meirihluti atkvæða úrslitum. Til að taka megi til meðferðar á þinginu mál, sem ekki var getið í fundarboði, þarf það samþykki 2/3 greiddra atkvæða, og 4/5 greiddra atkvæða til að samþykkja þau. Til lagabreytinga þarf samþykki 2/3 greiddra atkvæða.

13. grein

Fulltrúa ÍBR á Íþróttaþing skal kjósa á sambandsþingi.

Á héraðssambandið rétt á fulltrúafjölda, sem miðast við hlutfall fjölda félagsmanna ÍBR af heildarfjölda félagsmanna ÍSÍ síðasta starfsár fyrir Íþróttaþing.

1) Séu félagsmenn ÍBR færri en 10.000, skal fyrst kjósa einn fulltrúa frá framkvæmdastjórn, tvo, ef félagsmenn eru frá 10.000 til 19.999, þrjá, ef félagsmenn eru frá 20.000 til 29.999 og fjóra, ef félagsmenn eru 30.000 eða fleiri. Á sama hátt skulu jafnmargir varamenn kosnir.
2) Hverfafélögin skulu síðan tilnefna einn aðalfulltrúa hvert.
3) Íþróttafélögin skulu síðan tilnefna aðalfulltrúa í hlutfalli við fjölda þingfulltrúa sinna á þingi ÍBR unz tilskyldum fulltrúafjölda er náð, og skal miðað við reglur um hlutfallskosningar.
4) Varafulltrúar á Íþróttaþing, jafnmargir aðalfulltrúum, skulu valdir þannig:
a) Fyrst komi einn varafulltrúi frá hverju aðildarfélagi ÍBR sem hefur tilnefnt aðalfulltrúa án þess að fá fulltrúa kjörinn í röð sem ræðst af fjölda þingfulltrúa á þingi ÍBR.
b) Þá varafulltrúa sem þá á eftir að kjósa, skal velja eftir sömu reglu og aðalfulltrúar eru valdir.

Berist ekki tilnefningar til sambandsþings frá einhverjum aðildarfélögum, skal þingið kjósa fulltrúa til þess að fylla tölu fulltrúa sambandsins á íþróttaþing.

Þau félög sem ekki senda fulltrúa á ársþing ÍBR, fyrirgera rétti sínu til að senda fulltrúa á Íþróttaþing.

14. grein

Samþykki stjórnir 2/3 hluta aðildarfélaganna tilmæli um að aukaþing verði haldið skal verða við því. Einnig hefur stjórn ÍBR heimild til að boða til aukaþings. Um seturétt á aukaþingi fer skv. 9. grein.

Tilhögun aukaþings skal vera þessi:

1. Þingsetning.
2. Kosin þriggja manna kjörbréfanefnd.
3. Kosnir þingforsetar og þingritarar.
4. Tekin til meðferðar þau mál, er gefið hafa tilefni til aukaþingsins og tilkynnt voru með þingboðinu.
5. Önnur mál, sem upp kunna að vera borin, ef þingið leyfir að taka þau fyrir, sbr. 12. gr.
6. Þingslit.

15. grein

Á milli þinga stjórnar héraðssambandinu 7 manna framkvæmdastjórn, sem kosin er til tveggja ára í senn. Skal kjósa fyrst formann, en hina 6 í tvennu lagi, þannig að fæst þrír úr fráfarandi stjórn verði endurkosnir. Í framkvæmdastjórn má ekki kjósa þrjá eða fleiri menn frá sama aðildarfélagi. Formenn einstakra félaga, sérráða eða sambanda má ekki kjósa í framkvæmdastjórn.

Framkvæmdastjórn skiptir sjálf með sér verkum. Formannafundur skal haldinn það árið, sem þing er ekki haldið og gerir þá framkvæmdastjórn grein fyrir störfum sínum frá síðasta þingi og leggur fram ársreikninga sambandsins fyrir næsta reikningsár á undan.

16. grein

Stjórn ÍBR skal sjá um allar framkvæmdir sambandsins og vinna að málum þess. Stjórninni er heimilt að skipa nefndir innan eða utan sinna vébanda til að sjá um að framkvæma viss mál sambandsins. Formaður skal kalla saman fundi framkvæmdastjórnar eftir því sem þurfa þykir.

17. grein

Í íþróttagreinum, þar sem sérráð eru ekki starfandi, fer stjórn ÍBR með hin sérfræðilegu málefni innan héraðs og getur skipað til þess sérstaka nefnd, ef hún telur það hagkvæmara. Sérráð fer með stjórn í sérmálum þeirrar íþróttagreinar, sem það varðar. Endanleg niðurröðun móta á sambandssvæðinu og val keppenda á utanhéraðsmót er háð samþykki framkvæmdastjórnar ÍBR, ef um er að ræða lið, sem keppir í nafni sambandsins eða Reykjavíkur. Um fjárhagslega aðstoð bæjar- eða ríkis, svo og byggingu, viðhald og rekstur íþróttamannvirkja, er sérráð háð yfirstjórn ÍBR. Fyrir 15. apríl ár hvert skal sérráð senda til ÍBR starfsskýrslu, ársreikninga og mótaskýrslur. Hafi skýrslur þessar ekki borist fyrir 1. maí missir ráðið rétt sinn til að tilnefna fulltrúa á ársþing ÍBR.

18. grein

Stjórn ÍBR skal veita viðtöku öllum skýrslum um íþróttamót, sem haldin eru í héraðinu og geyma þær í skjalasafni sínu. Sé mótið haldið í sérgrein þar sem sérráð er ekki starfandi, skal félag það, sem fyrir mótinu stendur, senda skýrslu um það beint til stjórnar ÍBR, en annars skulu sérráð senda stjórn ÍBR heildarskýrslur um íþróttamót í sinni sérgrein, sbr. 17. gr. Sömu skyldur hvíla á stjórn ÍBR, ef hún gengst fyrir mótum. Skýrslur um mót skal senda í síðasta lagi mánuði eftir að móti er lokið. Allar þessar skýrslur má senda í tölvutæku formi til ÍBR.

19. grein

Ef ágreiningur rís innan stjórnar ÍBR eða meðal sambandsaðila um réttindi félaga eða um skilning á þessum lögum skal leggja málið fyrir dómstól ÍSÍ til úrskurðar.

20. grein

Lög þessi öðlast gildi, þegar framkvæmdastjórn ÍSÍ hefur staðfest þau.

Samþykkt á þingi ÍBR 28. febrúar 2009.