ÍBR, eða Íþróttabandalag Reykjavíkur eru heildarsamtök íþróttafélaganna í Reykjavík og var stofnað 31. ágúst árið 1944. ÍBR er aðili að Íþrótta- og Ólympíusambandi Íslands og er tengiliður íþróttafélaganna við Reykjavíkurborg. ÍBR gætir hagsmuna íþróttahreyfingarinnar í Reykjavík gagnvart opinberum aðilum og vinnur að eflingu og skipulagningu íþróttastarfsemi í Reykjavík.

Heildarfjöldi félagsmanna í íþróttafélögum í Reykjavík er um 50.000, af þeim eru virkir iðkendur um 35.000. ÍBR styður starfsemi íþróttafélaganna með styrkjum frá Reykjavíkurborg fyrir aðstöðu til æfinga og keppni og vegna ferðastyrkja en einnig fær íþróttahreyfingin í Reykjavík styrki frá ÍSÍ vegna hagnaðar af Íslenskri getspá og af Íslenskum getraunum.

Á meðal verkefna ÍBR eru:

• Úthlutun tíma til íþróttafélaga í íþróttamannvirki borgarinnar
• Útleiga á lausum tímum í íþróttamannvirkjum til almennings
• Umsjón alþjóðlega íþróttamótsins Reykjavík International Games
• Úthlutun á styrkjum til íþróttafélaganna
• Kannanir á þátttöku og styrkjum til íþróttastarfs
• Eftirfylgni með starfsemi íþróttafélaga
• Rekstur Reykjavíkurmaraþons og umsjón viðburða þess sem eru Miðnæturhlaup Powerade, Laugavegurinn – Ultra Maraþon og Reykjavíkurmaraþoni Íslandsbanka.
• Rekstur Skautahallarinnar í Laugardal
• Umsjón með íþróttaskóla fyrir 6 ára börn í samstarfi við íþróttafélögin og ÍTR
• Stuðningur við afreksfólk í Reykjavík
• Skipulagning þátttöku Reykjavíkur á Alþjóðaleikum ungmenna og Skólaíþróttamóti höfuðborga Norðurlandanna.

Þá gefur ÍBR reglulega út ýmis konar fræðsluefni, stendur fyrir námskeiðum, fyrirlestrum og ýmsum átaksverkefnum sem tengjast íþróttum.

Skráð félög innan ÍBR eru 68 talsins en innan þeirra eru starfandi 151 deild. Alls eru 17 félög skráð með fleiri en eina deild og 10 félög með fimm eða fleiri deildir. Þrjú stærstu íþróttafélögin í landinu eru í Reykjavík; TBR með 3.809 iðkendur, ÍR með 3.128 iðkendur og GR með 3.032 iðkendur.

Samkvæmt starfsskýrslum fyrir árið 2007 eru 34.639 skráðir iðkendur í íþróttafélögin í Reykjavík, 22.179 karlar og 12.460 konur. 16.949 eru 15 ára og yngri en 17.689 eru 16 ára og eldri.

Á Íslandi er hægt að iðka 39 íþróttagreinar, þær eru jafnframt allar í boði innan vébanda íþróttafélaganna í Reykjavík. Flest önnur íþróttahéröð eru með 5-10 greinar í boði.