Sumargjafaverkefnið hófst árið 2005 en hefur verið endurtekið á hverju ári og nú hefur bæst við einn árgangur sem fengið hefur sumargjafir.
Tilgangur sumargjafanna er að gleðja reykvísk börn og um leið hvetja þau til að hreyfa sig og leika sér með tilvísun í íþróttir almennt.

Börn í öðrum bekk fá sippuband og börn í þriðja bekk fá bolta. Með sippuböndunum og boltum fylgir bæklingur með æfingum og leikjum.
Fjórða bekk er boðið á skauta í Skautahöllina í Laugardal eða í Egilshöllina í Grafarvogi. Nú í fyrsta sinn fá börn í fimmta bekk sumargjöf og er þeim boðið að taka þátt í skemmtiskokki Reykjavíkurmaraþons 23. ágúst n.k. Þau fá bækling um hlaupaþjálfun og eru hvött til að æfa sig fram að þeim tíma.

Sumargjöfunum er dreift á skólatíma Grunnskóla Reykjavíkur og er það mikilvægt samstarf. Það er von okkar að foreldrar taki þessu vel og aðstoði börn sín og hvetji þau til að æfa sig og taka þátt í því sem í boði er.