Íþróttamaður Reykjavíkur 2011 er handknattleikskonan Hrafnhildur Skúladóttir úr Knattspyrnufélaginu Val.

Borgarstjórinn í Reykjavík, Jón Gnarr, afhendi Hrafnhildi verðlaunin við hátíðlega athöfn í Höfða í dag. Hún fékk af þessu tilefni farandbikar sem gefinn er af Reykjavíkurborg ásamt eignarbikar og 200.000 króna styrk frá Íþróttabandalagi Reykjavíkur.

Hrafnhildur fór fyrir liði Valsmanna sem urðu Íslands- og deildarmeistarar kvenna í handknattleik á árinu. Hún lék einnig stórt hlutverk í kvennalandsliði Íslands sem náði 12. sætinu á heimsmeistaramótinu í Brasilíu. Hrafnhildur er landsleikjahæsti og markahæsti leikmaður kvennalandsliðsins í handknattleik.

Allt frá árinu 1979 hefur stjórn Íþróttabandalags Reykjavíkur staðið fyrir vali á Íþróttamanni Reykjavíkur og er þetta því í 33. sinn sem Íþróttamaður Reykjavíkur er kjörinn. Smellið hér til að skoða lista yfir Íþróttamenn Reykjavíkur frá upphafi.

Tíu aðrir afreksmenn fengu einnig viðurkenningu fyrir árangur sinn á árinu 2011 í Höfða í dag sem afhendar voru af formanni Íþróttabandalags Reykjavíkur, Ingvari Sverrissyni. Íþróttamennirnir eru þau:

• Ásdís Hjálmsdóttir, Glímufélaginu Ármanni 
• Ásgeir Sigurgeirsson, Skotfélagi Reykjavíkur
• Eygló Ósk Gústafsdóttir, Sundfélaginu Ægi
• Hafþór Harðarson, Íþróttafélagi Reykjavíkur
• Hannes Þór Halldórsson, Knattspyrnufélagi Reykjavíkur
• Jón Margeir Sverrisson, Fjölni og Íþróttafélaginu Ösp
• María Guðsteinsdóttir, Glímufélaginu Ármanni
• Ólafía Þórunn Kristinsdóttir, Golfklúbbi Reykjavíkur
• Ragna Ingólfsdóttir, Tennis- og badmintonfélagi Reykjavíkur
• Þormóður Jónsson, Júdófélagi Reykjavíkur

Smellið hér til að fá upplýsingar um árangur ofangreindra íþróttamanna á árinu 2011 en þau hlutu öll 50.000 króna styrk frá Íþróttabandalagi Reykjavíkur og viðurkenningarskjöld í Höfða í dag.