Ellefu íþróttamenn hafa verið tilnefndir vegna kjörs íþróttamanns Reykjavíkur sem fram fer á morgun miðvikudaginn 4.janúar kl.16:00 í Höfða. Íþróttamennirnir ellefu fá viðurkenningu fyrir frábæran árangur á árinu og mun einn af þeim hljóta útnefninguna Íþróttamaður Reykjavíkur 2011.

Tilnefndir íþróttamenn eru eftirfarandi í stafrófsröð:

• Ásdís Hjálmsdóttir, spjótkastari frá Ármanni en hún varð m.a. þrettánda á HM í Daegu og er eini Íslendingurinn sem hefur gott sem tryggt sig inn Ólympíuleikana í London á næsta ári.
• Ásgeir Sigurgeirsson, skotíþróttamaður frá Skotfélagi Reykjavíkur en hann varða m.a tólfti á heimsbikarmótinu í Kóreu og 23ji á Evrópumeistaramótinu.
• Eygló Ósk Gústafsdóttir, sundkona frá Sundfélaginu Ægi átti stigahæsta sund íslenskra kvenna á árinu og varð í 2. sæti á Evrópumeistarmóti ungmenna.
• Hafþór Harðarson, keilari frá ÍR sem varð í 3. sæti á Evrópumóti landsmeistara.
• Hannes Þór Halldórsson, knattspyrnumaður frá KR varð bæði Íslands- og bikarmeistari ásamt því að vera valinn bestur á lokahófi KSÍ.
• Hrafnhildur Skúladóttir, handknattleikskona frá Val sem fór fyrir Íslands- og deildarmeisturum Vals og íslenska kvennalandsliðinu á heimsmeistaramótinu í Brasilíu.
• Jón Margeir Sverrisson, sundmaður frá Fjölni og Ösp sem náði 4. sæti á Evrópumeistaramótinu og er eini Íslendingurinn sem hefur tryggt sér þátttökurétt á Ólympíumóti fatlaðra í London.
• María Guðsteinsdóttir, kraflyftingakona frá Ármanni sem náði 13. sæti á heimsmeistaramótinu ásamt því að setja Íslandsmet í öllum greinum kraftlyftinga á árinu.
• Ólafía Þórunn Kristinsdóttir, kylfingur frá Golfklúbbi Reykjavíkur sem varð Íslandsmeistari í holukeppni, höggleik og sveitakeppni GSÍ. 
• Ragna Ingólfsdóttir, badmintonkona frá TBR sem sigraði Iceland International í fimmta sinn í röð, varð í 2. sæti í tveimur stigamótum Alþjóða badmintonsambandsins, komst í 8 manna úrslit á þremur og í 16 manna úrslit í fimm mótum. 
• Þormóður Jónsson, júdómaður frá Júdófélagi Reykjavíkur sem varð í 2.-7. sæti á þremur heimsbikarmótum Alþjóða júdósambandsins.

Allt frá árinu 1979 hefur stjórn Íþróttabandalags Reykjavíkur staðið fyrir vali á Íþróttamanni Reykjavíkur og er þetta því í 33. sinn sem Íþróttamaður Reykjavíkur er kjörinn. Íþróttamaður Reykjavíkur árið 2011 fær til varðveislu farandbikar og eignarbikar ásamt 150.000 kr styrk frá Íþróttabandalagi Reykjavíkur.