Grunnskólamót Höfuðborga Norðurlanda hefst í Reykjavík á morgun, tveimur dögum seinna en áætlað var vegna eldgossins í Grímsvötnum. Seinni partinn í dag hefur verið unnið hörðum höndum við að endursmíða dagskrá mótsins. Smellið hér til að skoða nýja dagskrá. Keppt verður í frjálsum íþróttum og handknattleik í Laugardalshöll en knattspyrnan verður leikin í Egilshöllinni í Grafarvogi. Athugið að þetta eru breyttir leikstaðir, knattspyrnan og frjálsar íþróttir áttu að fara fram úti en keppnisgreinarnar voru færðar inn vegna möguleika á öskuryki í loftinu og óheppilegrar veðurspár.

Grunnskólamót Höfuðborga Norðurlanda hefur verið haldið árlega frá árinu 1948. Reykjavík tók fyrst þátt í leikunum árið 2006 í Helsinki og er nú í fyrsta skipti gestgjafi mótsins. Íþróttabandalag Reykjavíkur hefur veg og vanda að skipulagningu og framkvæmd mótsins fyrir hönd Reykjavíkurborgar í samvinnu við íþróttafélögin í Reykjavík.

Keppt er í þremur íþróttagreinum á mótinu; knattspyrnu drengja, handknattleik stúlkna og frjálsum íþróttum drengja og stúlkna. Þátttakendur koma frá Helsinki,Kaupmannhöfn, Osló og Stokkhólmi auk Reykjavíkur. Hver borg er skipuð 47 manna hópi; 41 unglingur á aldrinum 12-14 ára, 4 þjálfarar og 2 fararstjórar. Hóparnir gista á Farfuglaheimilinu í Laugardal. Reykvísku unglingarnir koma úr 19 grunnskólum í Reykjavík og 10 íþróttafélögum. Lista yfir reykvísku þátttakendurnar má finna með því að smella hér.