Undanfarin fimm ár hefur Íþróttabandalag Reykjavíkur gefið börnum í grunnskólum Reykjavíkur sumargjafir. Börn  í 2. bekk hafa fengið sippuband,  börn í 3. bekk bolta, 4. bekk hefur verið boðið á skauta og börnum í 5.bekk í sund. Tilgangurinn er að gleðja reykvísk börn og um leið hvetja þau til að hreyfa sig og leika sér með tilvísun í íþróttir almennt.

Í ár var ákveðið að gera tilraun með að gefa 4.bekkingum sína gjöf, skautaferð, í kringum fyrsta vetrardag. Það er von okkar að þessi vetrarlega gjöf nýtist þá börnunum betur. Gjöfin barst til skólanna í vikunni og geta nemendur byrjað að nýta sér boðið fyrsta vetrardag laugardaginn 24.október næstkomandi.

Vetrargjöfin er með þeim hætti að hver einstaklingur fær aðgöngumiða að skautasvelli og leigu á skautum og hjálmi sem gildir í Skautahöllina í Laugardal eða í Egilshöll í Grafarvogi. Boðsmiðinn gildir fyrir einstakling á almennum opnunartímum eða á skólatíma fyrir bekk, en þá þarf að panta tíma og hafa með sér einn fullorðinn fylgdarmann.