Sautján manna hópur starfsmanna Oslo Idræts Kreds (Íþróttabandalag Osló) var í heimsókn hjá ÍBR í vikunni. Hópurinn kom til landsins til að skoða íþróttamannvirki á Íslandi og kynna sér skipulag íþróttamála.

Farið var í heimsóknir á ellefu staði á einum og hálfum þéttsettnum degi. Heimsóknirnar voru í Egilshöll í Grafarvogi, golfvöll GR á Korpúlfsstöðum, golfæfingasvæðið Básar í Grafarholti, fimleikahús Gerplu og Salalaug í Kópavogi, Laugardalshöll, Laugaból Þróttar og Ármanns í Laugardal, TBR-húsin við Gnoðarvog, Valsheimilið við Hlíðarenda, Laugardalslaug, World Class Laugum og Laugardalsvöll. Þá fékk hópurinn kynningu á skipulagi íþróttamála í landinu hjá ÍSÍ og fyrirlestur um helstu verkefni ÍBR. Móttökurnar í íþróttamannvirkjunum voru mjög góðar og starfsmenn einstaklega liprir við að sýna, segja frá og svara spurningum gestanna.

Norðmennirnir voru heillaðir af íþróttamannvirkjunum í borginni og þá sérstaklega sundlaugunum og fimleikaaðstöðunni. Í Noregi er lítið um sérhæfð mannvirki fyrir ákveðnar íþróttagreinar og því voru fimleikasalirnir, frjálsíþróttahöllin, skylmingamiðstöðin o.fl. eitthvað sem þau höfðu mikinn áhuga á. Þá fannst þeim magnað hversu mikla sundkennslu grunnskólabörn fá á Íslandi og öfunduðu okkur Íslendinga mikið af því góða skipulagi.

Meðfylgjandi myndir voru teknar í heimsóknum hópsins í vikunni, önnur á Korpúlfsstöðum með Hinriki G. Hilmarssyni og hin á Laugardalsvelli með Þorvaldi Ingimundarsyni.

Smellið hér til að skoða heimasíðu Oslo Idræts Kreds.