1. gr. Sjóðurinn heitir Afreks- og styrktarsjóður Reykjavíkur og er hann í vörslu Íþrótta- og tómstundaráðs Reykjavíkur.

2. gr. Sjóðurinn veitir styrki og viðurkenningar eftir nánari ákvörðun Íþrótta- og tómstundaráðs.

3. gr. Markmið sjóðsins er:

• Að styrkja reykvísk íþróttafélög til að halda uppi öflugu íþrótta-, félags- og unglingastarfi.
• Að veita einstökum afreksmönnum á sviði íþrótta viðurkenningu og stuðning til þess að þeir geti þjálfað sig að alefli og til þátttöku í mikilvægum keppnum.
• Að veita viðurkenningar til einstaklinga, félaga, hópa og fyrirtækja fyrir góða ástundun og gott fordæmi á sviði almenningsíþrótta og fyrir félagsstörf.

4. gr. Íþrótta- og tómstundaráð skipar þriggja manna stjórn sjóðsins, er einn tilnefndur af stjórn ÍBR en hinir án tilnefningar.

5. gr. Stjórn sjóðsins úthlutar styrkveitingum úr sjóðnum. Íþrótta- og tómstundaráði er heimilt að auglýsa eftir umsóknum um styrki eftir nánari ákvörðun sinni, en einnig getur það veitt styrki og viðurkenningu án umsóknar enda sé það sammála um slíka fjárveitingu.

6. gr. Tekjur Afreks- og styrktarsjóðsins eru sem hér segir:

1. Árlegt framlag úr borgarsjóði skv. fjárhagsáætlun.
2. Árlegt framlag ÍBR af sértekjum bandalagsins.
3. Allar tekjur af auglýsingum á eða í íþróttamannvirkjum borgarsjóðs.
4. Vaxtatekjur.

7. gr. Höfuðstóll sjóðsins má aldrei nema lægri fjárhæð en kr. 50.000.- miðað við lánskjaravísitölu í ársbyrjun 1987, þ.e. 1565 stig. Endurskoðaða reikninga sjóðsins skal birta árlega með reikningum borgarsjóðs.

8. gr. Samþykkt þessi tekur gildi þegar borgarráð Reykjavíkur hefur staðfest hana og um leið fellur úr gildi skipulagsskrá fyrir Styrktarsjóð Íþrótta- og tómstundaráðs Reykjavíkur frá 1979.

Samþykkt í borgarráði 20. apríl 1993.